Oxucularımız yaxşı bilirlər ki, 24 Yanvar 2018 tarixdə RealMedia.az "Yeniçağ.az”- a istinadən Xırdalanda fəaliyyət göstərən Abşeron rayonu 2 saylı Notariat Kontorunun xüsusi notariusu Günay Məsimovanın adının hallandığı qanunsuzluqlar barədə məqalə dərc etmişdi.

Xatırladaq ki, dələduzluğa məruz qaldığını deyən tikinti şirkətinin rəhbərliyi ədliyyə naziri Fikrət Məmmədova ünvanladığı şikayət ərazisində göstərirdi ki, bəzi dələduz şəxslər Abşeron rayonu 2 saylı Notariat Kontorunun xüsusi notariusu Məsimova Günay İsa qızı ilə birlikdə cinayətkar kombinasiya sayəsində vətəndaşlara məxsus külli miqdarda əmlakı mənimsəyiblər:

"Həmin dələduz şəxslər başqalarına məxsus əmlakı dələduzluqla ələ keçirmək üçün məzmunu əqdin şərhindən ibarət olan ərizə sənədlərini Abşeron rayonu 2 saylı Notariat Kontorunda 15.12.2016-cı il tarixdə 7E-7708 reyestr nömrəsi, 29.03.2017-ci il tarixdə 7E-2053 reyestr nömrəsi, 10.03.2017-ci il tarixdə 7E-1667 reyestr nömrəsi, 03.04.2017-ci il tarixdə 7E-2292 reyestr nömrəsi altında təsdiq etdirərək, həmin sənədləri vətəndaşlara mənzil alqı-satqı əqdi adı ilə təqdim edib. Beləliklə, başqasının külli miqdarda əmlakını ələ keçiriblər”.

Yuxarıda qeyd olunanlar sənədləri təsadüfən əldə etdiklərini deyən şikayətçilər bildiriblər ki, sənədlərin məzmunundan bu şəxslərin özlərinə məxsus olmayan binalarda müxtəlif mərtəbələrdə, müxtəlif sahəli mənzilləri vətəndaşları şirnikləndirmək üçün dəyərindən ucuz qiymətə, nisyə şərtlərlə təqdim etdikləri bəlli olur:

"Bu sənədlər təsdiq olunarkən onların əlində həmin mənzillərə dair sahiblik, istifadə və sərəncam hüququnu təsdiq edən müqavilə, maliyyə arayışı və ya qeyri sənəd olmayıb. Belə sənədlər ümumiyyətlə notariusa təqdim olunmayıb. Həmin şəxslərlə əvvəlcədən əlbir olan xüsusi notarius Günay Məsimova sadalanan saxta sənədlərin tərtib olunmasında və təsdiq olunmasında bilavasitə iştirak edib. Nəticədə vətəndaşların aldadılmasına nail olub. Halbuki, Azərbaycan Respublikası Mülki Məcəlləsinin 340.2 maddəsinə əsasən başqa əqdi pərdələmək məqsədi ilə bağlanan əqd yalan əqd hesab olunur”.

Şikayətçilərin yazdığına görə, adıçəkilən notarius hazırladığı sənədlərdə qanunvericiliyin tələblərini kobud şəkildə pozaraq, vəzifə səlahiyyətlərini aşıb: "Ərizə-sənədlər əqdin şərhindən ibarət olduğu üçün notarius "Notariat fəaliyyəti haqqında” Azərbaycan Respublikası Qanununun 67-ci maddəsinə və Azərbaycan Respublikası Nazirlər Kabinetinin 2000-ci il 11 sentyabr tarixli 167 saylı qərarı ilə təsdiq edilmiş "Azərbaycan Respublikasında notariat hərəkətlərinin aparılması qaydaları haqqında” Təlimatın 128 və 129-cu bəndlərinə əsasən tərəflərə onların iradəsinə uyğun olan əqd bağlamağı təklif etməli, müvafiq təsdiqedici sənədləri tələb etməli və müraciət edən şəxslərə hüquq və vəzifələrini izah etməlidi (qanunun 9-cu maddəsi). Onlar imtina etdiyi təqdirdə notarius da həmin saxta ərizələrin təsdiqindən imtina etməlidi. Bütün bunların əvəzinə notarius ona verilmiş səlahiyyətlərdən sui istifadə edərək vəzifə səlahiyyətlərini aşıb.Elə həmin səbəbdən vətəndaşlar həmin dələduzlara və onların bu işinə dəstək verən Günay Məsimovaya aldanıb va onlara külli miqdarda pul vəsaiti verib. Belə aldanmaların qurbanı olmuş vətəndaşlar həmin mənzillərə baxmaq və sənədləşmə işləri ilə tanış olmaq üçün bir dəfə də olsun həmin binaların satış ofisinə və ya inşaat meydançasına gəlməyiblər. Hazırda əlacsız qalan vətəndaşlar Azərbaycan Respublikası Baş Prokurorluğu yanında Korrupsiyaya Qarşı Mübarizə İdarəsinə müraciətlər edirlər”.

Müraciətdə bildirilir ki, şikayətçilər yuxarıda qeyd olunanları təsdiqləyən sənədlərə, video və fotomateriallara malikdirlər: "Göstərilən faktlarla bağlı hazırda Azərbaycan Respublikası Baş Prokurorluğu yanında Korrupsiyaya Qarşı Mübarizə İdarəsində araşdırma aparılır, vətəndaşlara dəymiş ziyanın ödənilmasi istiqamətində tədbirlər həyata keçirilir”. Müraciətin yekununda şikayətçilər ədliyyə naziri Fikrət Məmmədovdan haqqında danışılan notarial saxtakarlıqlar və bu qanunsuzluqları həyata keçirən notariusun fəaliyyətinə hüquqi qiymət verilməsini, eyni zamanda bu şikayəti şəxsi nəzarətinə götürməsini xahiş edir:

"Notariat fəaliyyəti haqqında” Azərbaycan Respublikası Qanununun 11-ci maddəsinə əsasən notariusun qanunsuz hərəkətləri nəticəsində ayrı-ayrı şəxslərə, təşkilata və ya dövlətə maddi ziyan vurularsa o, Azərbaycan Respublikasının qanunvericiliyi ilə maddi məsuliyyət daşımalıdır. Bu səbəbdən notariusun peşəkar fəaliyyəti sığortalanıb. Qeyd olunanları nəzərə alaraq, notariusun qanunsuz əməllərinə hüquqi qiymət verilməsi, araşdırma aparıldığı müddətdə vəzifələrinin icrasının müvəqqəti dayandırılması, vətəndaşlara və rəhbərlik etdiyim təşkilatın işgüzar nüfuzuna vurulmuş ziyanın notariusun şəxsi vəsaiti və sığorta olunan hissəsi ilə birlikdə ödənilməsinə, xüsusi notarius Günay Məsimovanın fəaliyyətinin daha dərindən yoxlanmasına (əlavə faktların aşkar olunacağına əminik) göstəriş verməyinizi və bu şikayəti şəxsi nəzarətinizə götürməyinizi xahiş edirik”.

Həmçinin qeyd olunur ki, nazirə müraciətdən sonra məsələnin araşdırması üçün təyin olunan şəxslər də qısa zaman sonra Günay Məsimovanın tərəfindən çıxış etməyə başlayıblar.

Qeyd: Nazirlik əməkdaşlarının şikayətçiləri aidiyyatı olmayan məsələlərə yönəldərək, G.Məsimovanı prossesdən "təmiz” çıxarmağa çalışmasının da özəl təfərrüatlarını öyrənmişik. Öyrənə bilmişik ki, Günay Məsimova respublikanın tanınmış şəxslərindən birinin qohumudur və bu səbəbdən də nazirlik əməkdaşları onun əməlləri ilə bağlı hüquqi ölçü götürülməsi məsələsində tərəddüd edirlər. Həmçinin, öyrənmişik ki, Günay Məsimova eynən işdə, vəzifədə olduğu kimi, ali məktəbdə oxuyanda da məhz himayədar dəstəyindən yararlanıb. Bu isə belə ehtimallara yol açır ki, G.Məsimovanın qol qoyduğu bəzi qanunsuzluqlar heç də korrupsiya niyyəti ilə deyil, məhz hüquqi savadının yetərincə olmaması səbəbindən törədilmiş olsun.

Araşdırmalarımızın gedişi belə deməyə əsas verir ki, dəqiqləşdirmə işləri yekunlaşandan sonra oxucularla irəliləyən görüşlərimizdə xüsusi notariusa "xüsusi imtiyaz” verən səbəb (səbəbkar) barədə təfərrüatları açıqlaya biləcəyik.

(xəbərçi.tv)