Sumqayıt şəhər icra hakimiyyətinin başçısı Zakir Fərəcov 3 dekabr beynəlxalq Əlillər günündə 15 nəfər Qarabağ əlilini işdən çıxarıb. Belə ki, 33 saylı marşrut xəttindən Qarabağ əlillərinin avtobusları çıxarılıb. Həmin marşrut xətti üzrə avtobuslarda çalışan Qarabağ əlilləri də faktı təsdiq ediblər.
Bu barədə məlumatı Qarabağ qazisi Rey Kərimoğlu özünün “Facebook” səhifəsində paylaşıb.
Məsələ ilə bağlı Altun.az-a Sumqayıt şəhər İcra Hakimiyyətindən verilən açıqlamada isə bildirilib ki, heç bir sürücü işdən çıxarılmayıb:
“Avtobuslar köhnə olduğundan xətdən çıxarılıb. Şəhərimizin müasirləşməsi üçün yeni avtobuslar gətiriləcək. Bu barədə işçilərə məlumat verilib. Onlar öz işlərinə davam edəcəklər. Narahatlığa heç bir əsas yoxdur”.
P.S. Maraqlıdır, görəsən, yeni avtobuslar gətirildikdən sonra köhnələrin xəttən çıxarılmasını həyata keçirmək daha məqsədəuyğun olmazdımı?!..