![Pakistan Azərbaycana neft emalı zavodunda pay təklif edir](https://azadmedia.az/uploads/posts/2024-07/1720446756_b709dcbc-9081-3968-a5c7-44e25f1549bc_850.jpg)
Pakistan Azərbaycanla iqtisadi əməkdaşlığı genişləndirmək, o cümlədən onun Pakistan neft emalı zavodunda (“Pakistan Refinery Limited”) səhmdar kimi iştirak etməsi üçün təkliflər hazırlayıb.
Azbaku.org xarici mətbuata istinadən məlumat verir ki, bu məsələlər bu yaxınlarda Pakistanın planlaşdırma, inkişaf və xüsusi təşəbbüslər naziri Ahsan İqbalın sədrliyi ilə Azərbaycan tərəfinə təqdim olunacaq investisiya təkliflərinin yekunlaşdırılması üçün keçirilən iclasda müzakirə olunub.
Pakistanın Baş naziri Şəhbaz Şərif planlaşdırma, inkişaf və xüsusi təşəbbüslər nazirinə 2-3 milyard ABŞ dolları məbləğində investisiya təklifləri portfelinin formalaşdırılması və Azərbaycana təqdim edilməsi üçün ticarət, sənaye, informasiya texnologiyaları, təhsil nazirlikləri, həmçinin Milli Qida Təhlükəsizliyi, İnvestisiya Şurası daxil olmaqla müvafiq qurumlarla məsləhətləşmələr aparmağı tapşırıb.
Bildirilib ki, neft qurumu Azərbaycanla əməkdaşlıq üçün müxtəlif potensial layihələr və istiqamətlər təklif edir. Buraya yeraltı qaz anbarı, “White Oil Pipeline”, mayeləşdirilmiş neft qazı infrastrukturu, “Pakistan Refinery Limited” (PRL) şirkətində iştirak payı, mis və qızıl hasilatı, Pakistan Dövlət Nefti (PSO) və SOCAR arasında birgə müəssisənin yaradılması, dənizdə və qurudakı kəşfiyyat blokları ilə bağlı investisiyalar daxildir.
Məlumata əsasən, Pakistan və Azərbaycan, həmçinin informasiya-kommunikasiya texnologiyaları sahəsində əməkdaşlığa dair Anlaşma Memorandumu imzalamağa hazırlaşır. Bu mənada Azərbaycanda IT kampuslarının yaradılmasının mümkünlüyü istisna edilmir.
Bundan əlavə, Bakı ilə tranzit və güzəştli ticarətlə bağlı danışıqlar aparılır. Pakistandan Azərbaycana əczaçılıq məhsullarının və smartfonların ixracının artırılması və SOCAR-a investisiyaların qorunması üçün qanunvericilik təminatının verilməsi imkanları da nəzərdən keçirilir.
Neft sektorunda SOCAR və “Pakistan LNG Limited” (PLL) Pakistana mayeləşdirilmiş təbii qaz tədarükünə dair Çərçivə Sazişi çərçivəsində əməkdaşlıq edir.
Qeyd olunub ki, 2024-cü il iyunun 28-də aidiyyəti nazirlik və departament nümayəndələri ilə keçirilən ilk görüşdə Azərbaycandan investisiya cəlb etmək üçün potensial layihələrin, sahələrin bölüşdürülməsi xahiş edilib. Bununla bağlı hesabat hazırlanıb.
Planlaşdırma, inkişaf və xüsusi təşəbbüslər naziri bütün maraqlı tərəflərdən Azərbaycanın xaricdəki investisiya yolunu araşdırmağı və Səudiyyə formatına uyğun olaraq investisiya prioritetlərinə uyğun konkret layihələr hazırlamağı xahiş edib.