Bunu Oxu.Az-a tanınmış kikboksçumuz Eduard Məmmədovun tibb işçisi kimi fəaliyyət göstərən tələbəsi Nərmin Ağayeva deyib.
32 yaşlı N.Ağayeva özü barədə söhbətə başlayaraq bildirib ki, idmandan əvvəl tibb bacısı kimi fəaliyyət göstərib:
“Orta məktəbi bitirdikdən sonra tibb kollecinə daxil oldum. Bu səbəbdən karantindən əvvəl də bir neçə klinikada tibb bacısı kimi işləmişəm. Hazırda tibb bacısı kimi könüllü olaraq koronavirusa yoluxmuş xəstələrə qulluq edirəm.
Amma tibb bacısı fəaliyyətimdən başqa, 2017-ci ildən idmanla da məşğul olmuşam. Elə kikboksinqdən başlamışam. 2018-ci ildən Eduard Məmmədovun “Ağ Canavar” klubunda məşq edirəm.
Mənim ən böyük uğurum ötən il 56 kq çəki dərəcəsində Azərbaycan çempionu adını qazanmağımdır. Ötən il isə Macarıstanın paytaxtı Budapeştdə keçirilmiş Dünya Kubokunda dördüncü yeri tutmuşam. Arzum dünya çempionu olmaqdır”.
Nərmin Ağayeva hazırda koronavirusa yoluxan ağır xəstələrlə məşğul olduğunu bildirib. Kikboksçu xanım tibb bacısı kimi son durumu da bizə çatdırıb:
“Vəzifələrimizə xəstələrə dərman verilməsi, sistem qoyulması, iynə vurulması və s. daxildir. Yoluxanlardan sağalıb evə gedənləri olub. Şükürlər olsun ki, hələ bizim mərkəzdə koronavirusdan dünyasını dəyişən olmayıb. İndiyədək 100-dən artıq xəstə qəbul etmişik. Bunlardan təxminən 80 nəfəri sağalaraq evə buraxılıb. Reanimasiyada 15 nəfərdən artıq xəstəmiz olub. Bəziləri sağalıb, bəziləri də palatalara köçürülüb. Hazırda reanimasiyada cəmi iki xəstəmiz var.
Şükür olsun ki, bizim mərkəzin reabilitasiya şöbəsində xidmət göstərən tibb bacılarından virusa yoluxan olmayıb. Amma bilirəm ki, digər xəstəxanada tibb bacılarından bir neçəsi virusa yoluxduğu üçün izolyasiya edilib. Təhlükəsizlik təchizatımız çox yaxşıdır. Tibb bacısının özündən də çox şey asılıdır.
Eynək və əlcəkləri çıxarmaq olmaz. Səkkiz saat boyunca xüsusi geyimlərdə işləyirik. İlk əvvəl buna dözmək çox çətindir. Çünki taxdığımız eynəklər nəfəsimizdən buxarlanır deyə, görmək çətinləşir. Üstəlik, səkkiz saat bu formada qaldıqda bədənin tər-su içində olur. Amma insan elə bir varlıqdır ki, hər cür şəraitə öyrəşir. Biz də buna öyrəşməyə başladıq. Halbuki, elə insan tanıyıram ki, bundan bezərək tibb prosesindən uzaqlaşıb. Bizim komandada belə bir halı olmayıb”.
“Bizim kimi tibb işçiləri iş günü bitdikdən sonra dövlət tərəfindən ayrılan hoteldə qalır, evə getmirik. Hotel rəhbərliyi idmançı olduğumu bildiyindən, mənə xüsusi şərait yaradıb. Həyətdə “qruşa” quraşdırılıb, elə burada məşq edirəm”, – deyə, Nərmin Ağayev sözlərini yekunlaşdırıb.
