İspaniya hökuməti tezliklə ölkədə fahişəliyi kriminallaşdıran qanun layihəsi təqdim edəcək.
 
Modern.az xəbər verir ki, bu barədə İspaniyanın baş naziri Pedro Sançes bildirib.
 
Sançes xatırladıb ki, bir gün əvvəl, martın 8-də İspaniya hökuməti insan alverinə görə cəzaları sərtləşdirən islahatı təsdiqləyib.
 
O, parlamenti sözügedən təşəbbüsü dəstəkləməyə çağırıb.
 
Qeyd edək ki, İspaniyada 1995-ci ildə fahişəlik dekriminallaşdırılıb. "Medicos del Mundo" təşkilatının məlumatına görə, İspaniyada təxminən 300 min qadın fahişəliklə məşğuldur, onların da 80%-i əcnəbilərdir. BMT İspaniyada fahişəlikdə dövriyyənin 3,7 milyard avro olduğunu bildirib.
 
2021-ci ildə Pedro Sançes fahişəliyi tamamilə qadağan edəcəyini və cinsi xidmətlər göstərilməsinin cinayət hesab edildiyini, daha sərt cəzalar tətbiq edəcəyini vəd edib.