Belçikada məhbusları evlərinə “məzuniyyət”ə göndərmək istəyirlər.
 
Modern.az xəbər verir ki, bu barədə "Deutsche Welle" məlumat yayıb.
 
Ölkənin hakimiyyət orqanları bu təşəbbüsü həbsxanalarda sıxlıq olduğu üçün gündəmə gətirib. Məhbusların sayı artıq tutumu keçib: Belçikada 10 700 yerə 12 mindən çox məhbus var. Antverpen, Brügge və bəzi digər şəhərlərdə həbsxanalar hətta yeni məhbusları qəbul etməkdən imtina ediblər. Martın 14-də isə nəzarətçilər birliyi hətta 24 saatlıq tətil elan edib.
 
Nəticədə Belçika Nazirlər Kabineti gözlənilməz təkliflə çıxış edib. Bəzi məhbuslar cəzalarını ev dustaqlığına çəkməyə göndəriləcəklər. Oxşar təcrübə artıq koronavirus pandemiyası zamanı tətbiq edilib - o zaman məhbuslar bir həftə evdə, bir həftə isə həbsxanada qala bilərdilər. Əsasən, bu cür “məzuniyyətlər” müddəti artıq başa çatmaq üzrə olanlara verilib. İndi güman edilir ki, digər cinayətkarlar da növbə ilə - bir ay kamerada, bir ay isə ev dustaqlığında ola biləcəklər.
 
Təbii ki, hamı “məzuniyyət”ə göndərilməyəcək. Terrorçuluq, cinsi cinayətlər və uzun müddətə azadlıqdan məhrumetmə cəzası alanlar yenilikdən təsirlənməyəcək.