“Yoldaşımla, balalarımla xəstəxananın dəhlizində ağrı çəkə-çəkə, zarıldaya-zarıldaya qalmışdıq. 2-3 ağxalatlı qız öz mobil telefonlarında məşğul idilər, sanki xəstəxanaya gətirilənlərin bunlara aidiyyəti yoxdur. İki-üç nəfər içkili adam da vardı, xəstəxana işçiləri olub-olmadıqlarını dəqiq bilmirəm, çünki canımızın hayında qalmışdıq. Dedilər, “bayramdır, həkimlər tətildədir”. Sonra da yolladılar qonşu korpusa, təxminən 45 dəqiqə də orada eyni münasibət gördük. Məcbur qalıb ailəmi yığıb xəstəxanadan çıxdım”.
Mingəçevir sakini Eldəniz Quliyev Meydan TV-yə danışır ki, martın 19-da saat 16.15-də idarə etdiyi avtomobil Qəbələdəki “Zarağan dairəsi” deyilən ərazidə qarşısına qəfil çıxan avtomobillə toqquşub. Nəticədə həm özü, həm də maşının içərisindəki ailə üzvləri – həyat yoldaşı Gülnar Quliyeva, 9 və 11 yaşında olan övladları xəsarətlər alıb. Eldəniz Quliyev zəng vuraraq hadisə yerinə Təcili Tibbi Yardım çağırıb. Beləcə, Təcili Tibbi Yardım maşınında Qəbələ Rayon Mərkəzi Xəstəxanasına götürülüblər. Ancaq xəstəxanada onlara tibbi yardım göstərməyə həkim tapılmayıb.
“Bilmirdi ki, bizi kimin üstünə yollasın”
“12 yaşlı oğlum Elvin ayağından, 9 yaşlı oğlum Ömər başından, yoldaşım qarnından, mən də sinəmdən zədələnmişik. Uşaqlar, yoldaşım zarıya-zarıya qalmışdıq. Ağxalatlı qızlar əllərində telefon, hərəsi bir tərəfdə öz məşğuliyyətində idi. Bir ağxalatlı qadın da narahat-narahat o baş-bu başa gəzirdi, “bayramdı, iş günü deyil”, deyib, bizi kimin üstünə yollasın, necə kömək eləsin deyə, var-gəl edirdi. Dedim, necə yəni, xəstəxanada “iş günü deyil” nə deməkdir. Hamının özəl xəstəxanaya getməyə imkanı yoxdur, qəzaya düşüb, xəsarət alıb, dövlət xəstəxanasında həkimlər bayramdadır deyə, ölməlidir? Sonra da bizi qonşu korpusa göndərdi, dedi ki, orda həkim olmalıdır. Nə bir həkim, nə bir cərrah, nə bir tibb bacısı gözə dəyirdi,” – Eldəniz Quliyev deyir.
“İzahatımda göstərdim ki, tibbi yardım göstərilməyib”
Şikayətçinin sözlərinə görə, qonşu korpusda da eyni durum yaşanıb. Təxminən 45 dəqiqə də burada tibbi yardım olunmasını gözləyəndən sonra xəstəxananı tək ediblər:
“Ailəmi də götürüb qayıtdım hadisə yerinə, polislər oradaydı, izahatımı verdim, izahatımda da göstərdim ki, xəstəxanaya götürülsək də, tibbi yardım göstərilməyib. Həm qarşı tərəfin maşınını, həm də mənim maşınımı cərimə meydançasına apardılar, ailəmi götürüb Mingəçevirə qayıtdım”.
“Ev şəraitində müalicə olunuruq”
Eldəniz Quliyev deyir ki, özü və ailə üzvləri Mingəçevir Mərkəzi Xəstəxanasında da eyni səbəbdən tibbi yardım ala bilməyiblər. Ona görə də ailəlikcə ev şəraitində müalicə almalı olublar:
“Ağrılarımız var, ailəm, azyaşlı övladlarım hələ də həm hadisənin şokunu yaşayır, həm də ağrı çəkirlər. Taleyimiz üzümüzə onda gülüb ki, daxili qanaxmamız olmayıb, elə xəstəxananın dəhlizindəcə, telefonda oyun oynayan ağxalatlı qızların gözü qarşısında keçinərdik, tükləri də tərpənməzdi. Yaralı insanlar xəstəxanalarda bu üzdən həyatlarını itirirlər. Baxımsızlıqdan, vaxtında tibbi yardım göstərilmədiyindən, qanaxmadan keçinirlər. Mənə təsir edən odur ki, ortada iki azyaşlı uşaq vardı axı, heç olmasa onlara diqqət göstərəydilər, uşaqlar zarıyırdı, onlarınsa vecinə deyildi”.
Meydan TV Qəbələ rayon Mərkəzi Xəstəxanası ilə əlaqə saxlamağa cəhd edib. Ancaq Qəbələ Rayon İcra Hakimiyyətinin rəsmi saytında qeyd olunmuş əlaqə nömrələrinə (0-160) 5-00-03; 5-13-89 – (Baş həkim, Sabir Bayramov), (0-160) 5-13-64 – (Baş həkimin müavini, Tofiq Hacıyev) etdiyimiz zənglər cavabsız qalıb. Bayram günləri ilə əlaqədan rayonun səhiyyə şöbəsi də tətildədir.
Müəlliflər: Meydan TV