Baş DYP İdarəsi küləkli hava ilə bağlı yük avtomobilləri sürücülərinə xəbərdarlıq edib.
AzBaku.org-yə DİN-in Baş Dövlət Yol Polisi İdarəsindən verilən xəbərə görə, küləkli hava şəraiti ilə əlaqədər olaraq yollarda yarana biləcək qəzaların və digər xoşagəlməz halların qarşısının alınması üçün hərəkət iştirakçılarından, xüsusilə yük avtomobilləri sürücülərindən yola çıxarkən diqqətli olmağı, yol hərəkəti qaydalarına istisnasız riayət etməyi xahiş edir.

Nəzərə almaq lazımdır ki, küləkli havalarda böyük ölçülü nəqliyyat vasitələrinin aşması və ya üzərində olan düzgün qablaşdırılmamış yükün yola dağılması halları baş verə bilər.
Qoşqulu, tentli, uzun ölçülü yük avtomobillərinin sahibləri və sürücüləri küləkli havalarda xüsusilə diqqətli olmalı, belə hava şəraitində bu növ nəqliyyat vasitələri ilə hərəkətin daha da çətin və təhlükəli olduğunu unutmamalı, daşıdıqları yükün qablaşdırılmasına xüsusi diqqət yetirməlidirlər.