Layihə “Essl Fondu”nun (Avstriya) “Zero Project Awardees 2024” müsabiqəsinin qalibi seçilib

Əmək və Əhalinin Sosial Müdafiəsi Nazirliyinin rəqəmsal layihələrindən biri olan “Əlilliyi olan şəxslər üçün proaktiv təyinat” layihəsi “Essl Fondu”nun (Avstriya) “Zero Project Awardees 2024” müsabiqəsinin qalibi olaraq fondun mükafatı ilə təltif olunub.
Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, “Zero Project Awardees 2024” müsabiqəsində 97 ölkədən 523 layihə iştirak edib, onlardan 75-i, o cümlədən “Əlilliyi olan şəxslər üçün proaktiv təyinat” layihəsi qalib seçilib.
Bu münasibətlə BMT-nin Avstriyanın Vyana şəhərindəki ofisində keçirilən tədbirdə mükafat nazirliyin Əlillik siyasəti şöbəsinin müdir müavini Ülvi Hüseynova təqdim olunub. Ü.Hüseynov tədbirdə layihə ilə bağlı təqdimatla çıxış edib, habelə ölkəmizdə son illər dövlət sosial xidmətlərinin rəqəmsallaşdırılması sahəsində əldə olunan nailiyyətlərə dair məlumat verib.
“Essl Fondu” qeyri-kommersiya təşkilatıdır. Fondun “Zero Project” proqramı BMT-nin “Əlilliyi olan Şəxslərin Hüquqları haqqında” Konvensiyasının qlobal miqyasda icrasına, bu sahədə aparılan işlərin təbliğinə və əldə olunan uğurların tanıdılmasına yönəlib.
Hər il keçirilən “Zero Project Awardees” müsabiqəsi əlilliyi olan şəxslərlə bağlı inklüziv təhsil, İKT sahələri üzrə uğurlu innovativ həlləri, həmin şəxslərin gündəlik həyatını yaxşılaşdıran qabaqcıl təcrübələri müəyyən etmək məqsədi daşıyır.