Ara-sıra çox müşahidə etmişik, pişiklərin işi tərs gələndə, öz quyruqları ilə oynayırlar... Bu, nə ilə əlaqədardır, deyə
bilmərik, ancaq məlum bir həqiqətə inanırıq ki, adam Allahsız olanda, haram onun gözlərini tutur, o, yaxşı ilə yamanı
seçə bilmir.
Son vaxtlar Tovuz təhsilində baş verən ciddi qanun pozuntuları tam mənada dövlət dəyərlərini aşağılayır. Aidiyyatı
orqanlar bu neqativ hallara məhəl qoymasa da, bu, bizim diqqətimizdən yayınmır. Tovuz rayon təhsil şöbəsinin müdiri
Validə Hüseynova nə ağ bilir, nə qara, onun bildiyi ancaq rüşvətdir. Elə buna görə də kimsə onun yolunun üstünə bənd
ata bilmir. Hətta deyirlər ki, dövlətin də ona gücü çatmaz...
Ərz olunur ki, Validə Hüseynova «Özbaşınalıq» adlı kitabın səhifələri üzərində at çapır, elə atın üstündəcə məktəb
direktorlarına necə göz ağardırsa, onlar da qorxularından ona «haqq» verirlər. Sonra da düşürlər müəllimlərin üstünə.
Yəni, direktorlar təhsil şöbəsinin müdirinə pul verir, müəllimlər də direktorlara. Bu pul yığma da birbaşa təhsil
prioritetlərinə zərbə vurur. Amma aidiyyatı orqanların tükü belə tərpənmir.
Sadalanır ki, Validə Hüseynova guya yığdığı pullarla yuxarıdan gələn «qonaqları» yola verir, guya müxbirlərə görüm-
baxım edir. Sözarası da deyir ki, mənə heç Təhsil nazirliyi də «kənara dur» deyə bilməz.
Həmçinin, deyirlər ki, Validə Hüseynova pulla bərabər bəzi məktəb direktorlarına qoyun, 100 ədəd kənd yumurtası
gətirmələrini tapşırır. Nə direktorlar, nə müəllimlər onun qəbuluna düşə bilmirlər. Sanki şöbə müdiri ilə onların arasında
bir Çin səddi var. Kimin sözü, şikayəti və dərdi-səri varsa, şöbə müdirinin bacısı Mədinə xanıma ağız açmalıdır. Yəni,
V.Hüseynova ənənəni bu cür qurub. Artıq həm direktorlar, həm də müəllimlər V.Hüseynovanın özbaşınalıqlarından,
idarəetmə tərzindən beziblər.
Görün, V.Hüseynova müəllimlərə necə yollar qoyub: demək, hansısa bir müəllim başqa məktəbdə də dərs demək istəsə,
bunun üçün yol açıqdır, lakin o, mütləq alacağı maaşın tən yarısını V.Hüseynovaya verməlidir. Bu da heç bir müəllimə
sərf etmir.
Bugünlərdə Xoşqədəm Hidayətqızının müəllifi olduğu «Səni axtarıram» verilişində Tovuzun təhsil sistemindəki
özbaşınalıqlar bir daha qabardıldı, Rusiya vətəndaşı olan Kəklik adlı bir qızın qeyri-qanuni Tovuzda təhsil alması
yolverilməz hal kimi diqqətə çatdırıldı. Bu, o anlama gəlir ki, Tovuz məktəblərində Allah bilir, daha hansı hoqqalar baş
verir.
Tovuz məktəblərində 10-11-ci sinif şagirdlərinin dərsə davamiyyətinin zəif, yaxud heç olmaması, bilik səviyyəsinin çox
aşağı düşməsi və s. də Tovuz təhsilindəki V.Hüseynova rejiminin bariz göstəriciləridir. Şagirdlərin məktəblərdə dərs
keçilmədiyi üçün əlavə müəllim yanına getmək məcburiyyətində qalmaları da bu fasonlu işin bir nümunəsidir. Həm də,
kənarlarda əlavə dərslərin keçilməsi, yəni repititorluğa şərait yaradılması da V.Hüseynovanın «yığım kampaniyası»na
xidmət edir.
Tovuz məktəblərində qış mövsümünə hazırlıqlar da ürək ağrıdır. Sinifləri qızdırmaq üçün valideynlərdən pul yığılır,
dövlətin verdiyi pullar isə V.Hüseynovanın şəxsi cibinə axır. Maraqlıdır ki, aylardır onun bu qanunsuz əməlləri və
özbaşınalıqları barədə təkrar-təkrar yazılsa da, kimsə ona «dur!» demir. Nə üçün? Axı hansı səbəbə...

Xəyal İmrə

ZamanTv.az